DSE終於殺到嚟啦！前幾篇就提醒過大家溫書同心態調整嘅注意事項，今次就同大家做一個應考必帶check list，同大家講吓有啲咩物品係必帶嘅。考之前一晚跟住個check list執書包，就唔洗擔心帶漏嘢影響考試表現啦！
1.應考三寶
咩都冇拎都唔緊要，最緊要帶准考證、身分證同錢。就算你咩都唔記得帶都一定要帶呢三樣嘢，即使冇帶文具，都可以臨急臨忙問人借。但係冇帶應考三寶其中一樣，都有機會冇得考試。仲有跟據前人慘痛經驗，千祈唔好咁傻豬打卡影准考證呀，每年都有人因為咁被取消考試資格㗎…
2.文具
考試準備多幾枝筆旁身是常識吧。要注意嘅係做MC卷要帶嘅HB鉛筆或者鉛芯筆，仲有提提大家做作文卷或者通識卷時最好用塗改帶，喺呢啲分秒必爭嘅時候，就唔洗哂時間等塗改液乾咗先再寫啦。記得帶Highlight Pen，Highlight 中點，就唔洗無限翻睇文章同題目。
3.計數機（數理科）
相信大家呢幾個月係操數嘅時候都同部計數機培養咗好好嘅感情啦，不過都一定有大頭蝦會唔記得。唔單止係考數學嘅時候要帶，考數理科例如physics嘅時候都有機會要用到計數機。所以以防萬一，小編建議大家都係個袋袋齊哂考試要用嘅嘢，一袋走天涯啦！
4.耳機/收音機（聆聽卷）
相信大家無考聆聽卷前一晚前都會double check自己有冇帶耳機同收音機㗎啦，上一篇文都提過大家要注意耳機收音機設備嘅規格，千祈唔好帶咗手機耳機或者無線藍芽耳機去考試呀！
5.防疫用品
呢樣係今年考生限定，而家風頭火勢大家都唔想冒咁大風險去考試，唯一可以做嘅就係保護好自己。除咗係考場唔好除口罩，都建議大家帶多幾個口罩替換，仲要帶備消毒用品。考前可以用消毒濕紙巾清潔枱面，考完就即刻洗手消毒。每個考生都有防疫意識，咁就可以將風險減到最低。
6.外套
最後最後，小編以過來人經驗提醒大家，大多數考場都會開行冷氣，仲要坐係到幾個鐘，所以大家記得帶定一件外套。最好係帶防水外套或者風褸，咁就唔驚帶哂啲細菌返屋企。最緊要係唔好冷病，人冇事先做到世界冠軍㗎嘛！
即刻入Gööp討論更多有關DSE備戰嘅話題！
相關文章：
如果你仲想知多啲Gööp嘅討論！歡迎各位同學仔加入對話，了解更多Gööper嘅意見！
— — — — — — — — — — — — — — — — — — — — — — — — — —
想知道更多香港學生嘅社群就㩒落呢度👉🏻https://goop.ai/
