讀唔到想讀嗰科－Re-JUPAS定係搏轉科好？

雖然JUPAS結果已經塵埃落定，但係即使唔滿意派位結果嘅話，都可以透過retake, re-JUPAS 或者 transfer 去改變自己嘅結果。之前喺講ASSO/HD定retake嘅嗰一篇文章度就講過retake要注意嘅事項。今次就針對比較 re-jupas 同埋 transfer轉科嘅兩個選項。

一、Re-JUPAS

單純re-JUPAS，就係用番過往嘅DSE成績去報多次JUPAS。所以，喺自己分數唔會轉變嘅情況下，唯一會改變嘅因素就係大學收生分數嘅改變。故此，re-JUPAS通常都係俾啲DSE分數有咁上下嘅同學。而適合re-jupas嘅同學都會符合以下兩個條件：

(1) 有信心成績足夠入翻首選科目

假如其實今年你嘅分數明明係該科收生嘅最低分數，但係唔好彩入唔到嘅話，其實都可以搏一搏下年收生鬆啲。而且亦都可以考慮埋該學科下年嘅收生名額會唔會新增或者減少。不過風險就係假如依然入唔到嗰科，咁樣你係咪會讀番原本嗰科呢。如果係嘅話，就會浪費咗一年時間嘞。所以，呢個option對於入咗U後，發現對自己科目興趣實在不大嘅同學特別適用，例如想文科轉理科或者法律轉醫療科目等等。因為就算入唔到首選嘅心儀科目，副選都比讀緊嘅嗰一科更合心水。

(2) 要quit咗U先

要留意返，符合申請JUPAS嘅一大要求係「並非正在修讀經JUPAS可選報的全日制學士學位課程」。換言之，如果accept咗offer之後又想re-JUPAS，就要放棄咗個學位先，亦即係所謂嘅quit u。由於報JUPAS嘅deadline係入學年份前一年嘅十二月，所以要喺只係讀咗大學短短幾個月內就要決定好 quit u 以 re-JUPAS。Quit 咗 U 之後就會無咗學生身份，無得再用大學嘅設施。不過直至下年入學之前亦都唔駛再讀書，所以有成九個月嘅空閒時間，當gap year咁用，可以去旅行（假設有得去。。。），做義工等等。

其實JUPAS都會接受late application，而late application嘅deadline就係大概入學年份DSE放榜前後。官方嘅講法就係只會喺特殊情況下接納late application，又要提供充分理據。不過有唔少實例就即刻其實通常都會受理。但係始終佢都有權唔接納申請，如果一早諗定想quit u嘅同學就應該盡早quit u避免遲交。另外，late application仲有額外350蚊附加費㗎。

另外，呢個限制對於HD/ASSO唔適用。換言之，係可以一邊讀ASSO/HD，一邊報JUPAS，不過向自己院校提交嘅升學申請就會失效。同樣地，限制亦都對外地唔適用。你係可以去咗外國讀大學之後一邊讀大學，一邊報JUPAS。

二、 Transfer

Transfer嚟講，都會有分internal transfer同埋跨U transfer。因為入咗U之後就唔會再睇DSE成績，所以可以用嚟俾啲DSE分數唔夠理想科目高嘅同學去讀返想讀嘅科目。不過要留意，transfer無一個好似JUPAS咁統一嘅system，所以不確定性就比較高。曾經聽過好多人都係年年去求人哋畀佢轉，求咗幾年，去到就快畢業，先至轉到，變咗又要再讀過。

同埋亦都可以參考返唔同大學對於轉科嘅自由度都唔同。例如中大就係不嬲都較有「只有轉系」嘅風氣，transfer喺中大嚟講就比較容易。不過亦都可以留意吓各大嘅policy，例如港大就表明不接受internal transfer去牙科，詳情要睇返各大嘅網站。亦都會有啲programme-specific嘅transfer選擇，例如每年JS6717都有幾個名額畀人轉去JS6810。

而且，最重要嘅係要transfer成功，一定要GPA高！要去到幾高？大概first hon嘅GPA先至較大機會transfer到，即係同屆嘅top 10%到。所以如果有興趣transfer，就要及早搏盡讀書，爆GPA博transfer。故此有人話，DSE唔努力，變咗要喺大學加倍努力去轉科。同埋，入到大學咁多嘢玩，就會好易令人失去動力搏盡讀書去transfer㗎。

總括而言，如果DSE成績足夠，都建議選擇quit U去re-jupas。相反，如果DSE唔夠分讀心儀科目，就試吓搏盡讀書爆GPA去申請transfer喇。