強身健體之新手健身4大事

FB Share

近來健身風氣越來越普及,唔少同學仔喺大學甚至中學嘅時候已經開始接觸健身!但其實有train開嘅老手都會明白,自己喺起步果陣犯咗好多新手嘅毛病,行咗唔少冤枉路。所以無論你健身嘅目標係想強身健體去保護自己同身邊嘅人定係想改變外型都好,啱啱起步嘅你一定要注意以下四樣野!

目標管理

「練到Zac Efron咁就fit啦」
「爆哂6舊腹肌,目標緊係成個the rock咁粗嘅手臂」

有無發覺有好多身邊嘅朋友起步嘅時候都講埋啲類似嘅說話?喺起步時,除左要訂立一個長遠嘅目標,更重要係你嘅小目標!因為如果我哋只係唸點樣先可以變男神,只會令自己好易迷失然後就會放棄。同學們不妨了解自己想達成嘅目標,例如係時間 (你目標係要幾耐去達到呢個身材?),體重(你距離目標嘅體重仲差幾多?)。好簡單地去計自己每星期要增/減幾多先會達到目標。呢類嘅小指標能夠令你可以有效咁督促自己,咁就事半功倍啦!

良好嘅訓練概念

喺呢個資訊發達嘅年代,好多學生都鐘意上youtube/艾珠到睇點做gym。但其實呢啲資訊好多都未必適合一啲新手,而夾硬跟隨只會令自己受傷或者忽略基本功。新手上路嘅同學們不妨先由機器訓練 (machine exercise)開始先,姐係大家口中嘅「推機」。原因好簡單,因為呢類嘅機器能夠集中地令你運用果一舊肌肉做某個動作,大大增加你對肌肉運用嘅能力同減低因用錯肌肉而受傷嘅情況!再叻啲之後可以試free weight exercise(啞鈴,杠鈴嘅訓練),然後就係三大動作(深蹲,硬拉,卧推)。仲有一樣好好好好好緊要嘅原則,就係唔好搏老命咁揀啲自己handle唔到嘅重量去做。去訓練切忌英雄主義而夾硬上,其實無人望緊你亦都無人想知你做緊幾重,舉幾多做幾多都係自己㗎。所有嘅training都要係由基本功開始,識得運用你嘅肌肉先至可以不斷進步再去挑戰唔同動作!

一個好嘅training plan

對於任何程度嘅人都好,無一個well planned嘅訓練計劃就一定影響自己嘅進步空間。好多人的起心肝去gym,但去到之後你問佢今日會集中練咩,佢會答你

「Errrrrrrrrr。。。唔知喎。。。腳囉。。。有時間就加啲手囉」

你不妨再問下佢聽日呢?後日呢?呢個月呢?

問題就係新手初期好容易會出現freestyle training(亂操)嘅情況。同學們不妨可以由最簡單嘅plan開始。例如:一星期只係操到一日(當然就全身咁操),兩日/四日(分開一半時間上半身/一半時間下肢),五或六日就可以將大肌肉同細肌肉pair住咁操(例如背+二頭肌,胸+三頭肌,下肢+三角肌,再重複咁操)。更加可以配合帶氧運動(跑步,游水,踩單車等等),令訓練更多元化!當然呢類只係一啲建議嘅做法,世間上有大把更好更複雜更專業嘅訓練安排。但新手上路嘅你,呢啲簡簡單單嘅plan已經係絕對夠用兼有突了。若然要有個人而設嘅訓練,必定要徵詢專家同教練~

下肢訓練嘅重要性

正所謂「力從地起」,同學們切忌skip leg day~無論係做運動定日常生活定外型嚟講都一定要記住下肢力量、穩定性嘅重要!無數嘅訓練動作都係建基於一個好嘅重心同下肢力量而起。再講,訓練下肢會激發到身體入面睾酮同growth hormone嘅增長,大大幫助你build up肌肉力量同Size。所以話,訓練你嘅下肢同時你都係幫緊全身肌肉嘅發展,抵到爛啦。記住,奪命香雞腿總比筷子腳好~

相關文章