Gööp 民意調查報告(4)-最有骨氣校長
喺反修例風波下，香港11間大學嘅校長對於反修例運動事件都有表態。有校長選擇公開同學生對話，亦都有校長就表示應該譴責社會暴力行為。11間大學既校長都有唔同嘅行動，所以Gööp特意做咗一份民意調查，了解下香港嘅大專生對各院校嘅校長有咩評價先!
樣本資料:
- 調查日期：2019年10月13日至10月20日
- 調查方法：經由Gööp網上平台收集意見
- 調查對象：香港大學生
- 成功收集樣本數目：3,502票
民調結果顯示，有接近四成半(43%)嘅香港大專生認為香港中文大學校長段祟智係11位大學校長當中最有骨氣。其次，嶺南大學校長鄭國漢(18%)、恒生大學校長何順文(15%)，樹仁大學胡鴻烈校長(11%)，亦獲得較高嘅票。
相反，以下的7位校長嘅票數均不超過5% 。包括：科大校長史維、港大校長張翔、教大張仁良、浸大錢大康、理大勝錦光、城大郭位，公大黃玉山。
民意調查分析：
中大段祟智校長 - 有誠信有承擔
睇完各位同學仔嘅討論後，我哋發現中大校長段祟智(43%)，能夠成為最有骨氣校長嘅原因係段校長有履行校長嘅社會責任。段校長係同被捕同學進行兩個鐘嘅閉門交談之後，曾經承諾會出公開信回應被捕學生事件。段校長履行承諾並係公開信提出一系列措施：加強校園保安、成立校內迅速應變小組、為學生提供情緒輔導及義務法律支援等等。段校長亦都提及對於部分警務人員涉嫌不當使用暴力或違反人權，經過查證後須予以譴責。即使有同學認為段校長應該一早就為學生發聲，但係公開信出後，學生認為段校長都係一位有誠信、有承擔同關懷學生嘅校長。
嶺南大學鄭國漢校長 - 727同學生「站在同一陣線」
嶺南大學鄭國漢校長(18%)獲得第二高嘅票數。原因係鄭校長曾經現身係元朗遊行，同學生同行。事因嶺南大學校友及學生曾經發起集會「Homecoming Day」，促請特首林鄭月娥罷免何君堯的嶺大校董一職。係集會中，鄭校長強調校方和學生係「站在同一陣線」。鄭校長同嶺大副校長莫家豪現身係元朗，同學生一起巡視環境，保障嶺南師生安全。有唔少同學仔都欣賞佢身體力行，唔單只係書面上行動，並且親身行動，到現場保護學生！
樹仁大學胡鴻烈校長 - 毋忘創辦樹仁大學初心
同學仔認為樹仁大學胡鴻烈校長(11%)對反修例運動事件未有作出太多嘅回應，但有唔少同學仔都欣賞樹大胡懷中副校監嘅回應。胡懷中副校監早係7月頭已經公開致樹仁仝人書，信中提及希望學生係面對社會及人生嘅挑戰時，作出利眾利己，無悔青春嘅抉擇。其後，胡懷中副校監係10月18日亦都係樹仁師生函中，提及如果有學生遭法律控訴，會根據香港實行普通法奉行嘅無罪推定原則，即係法庭裁定前均假定無罪。胡懷中副校監強調育德立仁係創辦樹仁大學嘅初心。
另一方面，學生一面倒批評7位獲得較低票數嘅校長。當中原因係同學仔認為校長好似「失蹤」同唔存在咁。同學亦都批評校長唔願意同學生正面對話，對反修例運動事件避之則吉。當中城大校長郭位受到最多嘅批評。事實上，城大學生會臨時行政委員會，城大教職員協會曾經先後要求同長郭位公開會面，但都被拒絕。學生認為校長係一校之長，校長有責任去保障學生，去聆聽師生嘅需求。對於社會事件，唔應該以逃避既方式去面對。
如果你仲想知多啲Gööp嘅討論！歡迎各位同學仔加入對話，了解更多Gööper嘅意見！
— — — — — — — — — — — — — — — — — — — — — — — — — —
想知道更多大專嘅資訊同加入大專嘅社群就㩒落呢度👉🏻https://goop.ai/
