每年都有唔少Asso嘅同學仔上岸入翻U，但係好多人都驚適應唔到大學嘅生活，甚至驚比其他嘅人排斥，但係事實又係咪咁樣呢？

學業篇：

Asso上嚟嘅人通常DSE分都無咁理想，所以會覺得自己讀書無其他人咁好，但係大學嘅模式同DSE好唔同，唔係一試定生死。相反，Asso嘅模式同大學比較相近，例如點樣寫一份professor鐘意嘅essay，present點樣可以高分，依啲都係asso同學比較擅長嘅野，而你上得翻岸嘅都係因為喺asso有唔錯嘅成續，比起DSE嘅學生要由零開始適應，其實你地係贏在起跑線。

比起DSE學生，英文可能會係asso學生比較輸蝕嘅一環，而大學對英文嘅要求亦都比較高。除咗課堂之外，好多時候做project都會有non-local嘅groupmate，所以聽、講、寫喺大學都好重要。如果本身英文底子唔好嘅可以睇啲容易入口嘅YouTube channel好似BBC Learning English，或者買一本grammar book溫熟佢。打好個底之後可以用啲生活化嘅方式練吓英文，例如睇吓英美劇，或者自己感興趣嘅外國YouTube channel，最緊要係開英文字幕，將英文融入生活，咁要處理大學嘅英文就會更加得心應手。

U life篇

好多上到岸嘅同學asso個時都係專心讀書，無咩參加活動，所以入到U一方面又想享受大學生活，另一方面又驚兼顧唔到或者比其他人歧視。

首先，大學入面有好多唔同背景嘅人，除咗asso同dse次外，有人可能係考IB入，有啲可能係trans U，甚至有啲係mature student，所以喺大學入面其實無咩人會問你點樣入U，所以唔駛驚比人排斥或者歧視。

另外，可能你想上莊住hall或者參加唔同嘅活動但又驚兼顧唔到學業嘅，我嘅建議係點都試咗先！始終大學嘅生活一世得一次，唔試又點知自己兼顧唔到。就算你真係發覺自己唔適合，你都可以中途quit莊或者hall，去試其他方面嘅Ulife 。記住大學就係一個比你自己自由選擇同埋嘗試嘅地方，而且每個人對Ulife嘅定義都唔同，唔需要怕其他人嘅目光。

最後，你地入到大學就同其他同學一樣都係大學生，唔需要因為自己係經asso入U而感到任何愧疚。記住你地都係靠自己嘅努力先上到岸！希望大家會享受你嘅大學生活！