近排武漢肺炎肆虐，所有中小學同部份大學都停課至3月2號。出面冇人封關幫我地把守咁危險，唯有就將自己留係屋企遠離病菌啦！不過成個月流流長留喺屋企有咩做？除咗可以透過學校online learning上課同上網搶口罩之外，仲可以趁呢段時間留喺屋企上網自學一種新語言增值自己添～以下落嚟就推介三個實用嘅自學語言網頁/程式比大家啦！
- Language Learning with Netflix
好多人係屋企都會選擇煲劇，相信Netflix都係大家嘅好朋友啦。而 Language Learning with Netflix喺 Google Chrome嘅擴充功能插件，為過千套Netflix電影/劇集提供多種語言嘅字幕同字典功能。無論日劇、韓劇定美劇等都有雙語字幕翻譯，仲可以更改播放速度，比時間你去慢慢消化句子嘅意思，聽真啲Oppa究竟講緊啲咩。平時睇Netflix淨係可以睇單字幕，有咗呢個程式就可以邊睇電影/煲劇一邊學習啦！即使唔係學習新嘅語言，都係練習英文嘅好幫手。而 Language Learning with Netflix嘅基本功能都係免費嘅，睇嚟今個停課假期小編都要重新煲多一次Stranger Things先得啦！
2. 韓文101
韓文相信都係近年最受歡迎外語學習嘅語言，除咗透過睇韓劇學習一啲單字，基本功都好重要㗎。韓文101呢個手機app就可以比大家學習韓文最基本嘅「字母」、「音節」同「字表」，仲有提供基礎母音、子音嘅真人發音同寫法，等大家可以逐個逐個跟住讀。練習完後仲有啲小測驗比你測試下自己究竟學識幾多，版面操作仲好簡單添。正所謂熟能生巧，有呢個智能小老師，跟多幾次一齊讀，真係留係屋企都可以輕鬆學韓文㗎，學完一啲基本功再睇返幾套韓劇慢慢練習，咁就事半功倍啦。
3. 五十音輕鬆學
學習日文比起韓文似乎更加難上手，因為日文有成50個音咁多！不過唔緊要，有成個月時間咁多，再加上以下落嚟要介紹嘅手機app，一定可以幫到你。五十音輕鬆學呢個app都一樣有真人發音，讀齊哂50個音後仲可以比你動手書寫練習筆順，可以認識正確嘅字體寫法之餘，邊聽邊寫邊讀，仲可以加強對日文嘅記憶添。雖然有呢個app幫手可以好方便咁上手學日文，不過要記哂呢50個音分分鐘都要花幾個禮拜時間，學哂50音先係第一步渣，睇嚟距離可以係下次去日本旅行嘅時候講流利嘅日本都仲有好長嘅路～
其實學習一種新語言不外乎都係要多讀多聽多寫，有咗呢幾個小幫手，係呢段悠長嘅停課假期，大家都不妨嘗試接觸下一種新語言充實自己啦！
如果你仲想知多啲Gööp嘅討論！歡迎各位同學仔加入對話，了解更多Gööper嘅意見！
— — — — — — — — — — — — — — — — — — — — — — — — — —
想知道更多大專嘅資訊同加入大專嘅社群就㩒落呢度👉🏻https://goop.ai/
