2020DSE 衝刺攻略 (3) : 保持心態

FB Share

2020DSE 衝刺攻略 (3) : 保持心態

「心態決定一切」 — 一句聽落超級老生長談嘅金句。事實上,踏入考場之際,全港考生睇過嘅書、溫過嘅notes、操過嘅卷都大致相同,喺呢個時候,你心態保持得好,就係你贏嘅第一步。

咩叫一個「好」嘅心態呢?面對呢個影響終身嘅公開考試,唔緊張係無可能嘅,而且嚟自家長、老師、前途、升學等等四方八面嘅壓力之下,崩潰一次兩次可能都係可以話係正常。 所謂一個好嘅心態,就係唔好比以上呢啲壓力、緊張拖累你嘅成績,維持良好精神狀態,積極面對公開考試!(上述兩句真係好似喺長輩圖copy出嚟咁)。

精神狀態唔好,好容易令你考試同溫書期間無辦法集中注意力,事倍而功半,繼而考MC卷睇漏題目導致所有答案向上移咗一格,明明pastpaper做過好多次但係臨考就偏偏記唔起,記錯考場位置導致遲到等等……以上種種都只係對於溫習進度同成績嘅影響,都仲未計對於自身健康同身邊人嘅影響等等。所以,究竟有咩方法可以保持好嘅心態同精神狀態?

1.睡眠

睡眠對每一個人嘅影響比各位自己想像應該更加重要得多。試諗諗你半夜三點(假設你未訓覺)比人叫醒做pastpaper,你唔發嬲已經代表你EQ高,同樣地,喺唔夠瞓嘅情況之下去溫書同操卷,你一樣會好難集中精神。或者之前停課個幾月大家覺得浪費咗好多時間,打算呢一個月夜少少瞓去追番啲時間返嚟,但實際上咁樣絕對得不償失。

千祈唔好以為你身體會「習慣」一日得4–6個小時睡眠時間。當你一段長時間連續日日唔夠瞓,你身體係會啟動一啲機能強逼你去休息,最後你開咗timer做份數學卷,最後做完Part A就趴喺張檯瞓著,相信呢個結果大家都唔想見到嘅。

養生文章通常都會教大家要喺子時(夜晚11點至1點)瞓覺,等身體自我修復,但就算係備戰DSE嘅角度嚟講,早睡早起都係一個適合準考生嘅生活循環。一般嚟講,人喺日頭嘅時候工作效率會高過夜晚,因此你凌晨12點至4點去溫書嘅效率,會比你朝早8至12點溫書嘅效率低。如果你每晚11點訓,第二朝7點起身,整頓一個鐘之後開始溫書,比起你每晚溫到三至四點然後訓到十一點嚟講,你會發覺你好似有種每日多左時間用嘅感覺,而你溫習嘅時候,內容會更加入腦。

再者,雖然唔係專業心理學家,但「深宵、一個人」呢個狀況,單憑想像已經覺得有種憂鬱嘅感覺。人類喺日照時間下工作會令施加喺自己身上嘅壓力得以減少。當然,大家唔一定要好嚴格話每日11點上床訓覺,但整體嚟講早睡早起對DSE準考生嚟講都係非常重要。

2.日常生活

年年嘅考生都會話自己DSE考試之前嘅study period都要「閉關修煉」,結果就係將自己成日都鎖喺書檯前或者自修室裏面應付咁多科嘅paper同notes。當然,逼自己專注喺溫習嘅重要一環,但千祈唔可以唔記得其他生活嘅環節。

考DSE嘅時候,有啲考生真係會廢寢忘餐,每日只靠屋企人帶嚟嘅一個飯盒,用5分鐘快快食完就算數。呢個方法節省時間一流,但係會令到自己越嚟越緊張,進入一個精神繃緊嘅狀態,對於溫習嚟講都唔係太好。當你逼自己連續focus 10個鐘,你會發覺自己集中唔到,坐喺度發呆,行行下去廁所,唔記得自己行緊去邊etc. 與其浪費時間發呆,倒不如用少少時間放鬆自己。

所以,如果時間許可,我喺度建議大家盡量維持返日常生活嘅習慣,例如食飯係正常咁食早午晚正餐,以前日日打機嘅可能每日限制自己打30分鐘,鍾意睇電視睇YouTube嘅逼自己最多一路食飯一路睇或者睇夠1個鐘就要熄機。維持返正常生活嘅狀態,係維持心態健康好重要嘅一步 。當然,如果想出街都可以,記得注意衛生,戴返個口罩。

3.對抗誘惑

比起以前A-level年代,依家個個都攞住部智能手機,隨身帶部laptop,嚟自遊戲同埋媒體嘅引誘越嚟越大。溫溫下書,一個message過嚟,你就開始覆機;操操下paper,一個noti彈出嚟,你就開始睇片。面對呢類誘惑,最後嘅解決方法就係接受佢地。

所謂接受,唔係話你一癮起就去打鋪機,而係你提前要set定一個時間,你每日最多打幾耐機,或者可能每兩個鐘,你就放一個15分鐘嘅「小息」比自己,休息完之後再接再厲。好多時候,你發覺呢種間唔中放縱一下嘅溫習模式,比你連續咁溫書更加有效。正如上面講過,我地要適當時候排解下壓力,除左溫書更加有效率之外,亦都令你更加容易對抗誘惑。當每次突然心血來潮想用電話,你就同自己講「等多半個鐘我就可以用電話」或者「啱啱先㩒完,過多陣再覆機啦」,有時候係比起自己完全鎖埋部電話同電腦,幫自己對抗誘惑嘅更佳辦法。

當然,咁樣就可能無辦法好似上面咁講「維持以往嘅日常生活」,但係呢個就係生活同考試之間嘅平衡同取捨,既然DSE都係一生人一次,大家不妨呢兩個月放一放低電話同電腦,搏盡埋呢個最後一刻!

4.信念

最後一點,亦係最重要一點,就係你要對自己有信心。你進入考場一刻,決定你心態係點嘅,唔係你有無溫夠書,而係你相唔相信自己溫夠數。學海無涯,DSE範圍其實無可能「溫曬」,大部分試卷都唔係expect考生攞100分,所以要同自己講,我已經盡力,溫得足夠,出嚟嘅成績會對得起自己,咁樣已經足夠。強逼自己溫曬所有內容,先不論有無可能,過程比自己嘅壓力已經係太多太過分。

當然,咁樣唔係叫你自欺欺人,溫得一課就同自己講溫完成科。係成個溫習同操paper過程當中,當你發覺你做起題目上嚟唔算太吃力,見到題目唔會完全一頭霧水,其實已經可以同自己講放鬆啲,唔好比咁大壓力自己!下一篇,再同大家一齊探討下就溫書過程有咩要注意。

By Gööp 升學攻略大使:Coeus Lee

工商管理學學士(法學)及法學士二年級 香港大學

相關文章:

1.HKDSE Tips Youtube Video 懶人包

2.2020DSE衝刺攻略:認識自己

3.2020DSE 衝刺攻略(二): 制定計畫

— — — — — — — — — — — — — — — — — — — — — — — — — — 
想知道更多有關中學嘅資訊同加入全港中學生嘅社群就㩒落呢度👉🏻https://goop.ai/

Related articles