仲有兩日就放榜啦，喺收到成績公佈後，大家都仲有機會可以更改課程嘅選擇同排位。至於點樣先可以把握機會透過JUPAS入大學？就要睇哂以下攻略啦！

幾時可以更改課程選擇？

DSE放榜後，同學可以喺2020年7月23號（上午10時）至7月25號（上午11時）期間嘅個人時段內修改其課程選擇。每位申請人都會獲分配一個修改課程選擇嘅時段，同學可以登入「大學聯招辦法」帳戶查閱獲分配修改課程選擇嘅個人時段。

要點改？

喺JUPAS排位中，Band A嘅選擇係最重要，所以同學應該將自己最心儀嘅大學課程放在A1；A2位置就適宜放成績達到平均收生要求；而A3位置最好係分數到達最低要求嘅學科、而且收生人數較多嘅學科。至於Band B就應該保守啲，放自己較有信心考入嘅學科。

• 分數有把握（五科成績有28分或以上）

如果同學嘅分數有把握入到心儀嘅大學/科目，大可以放心將心儀科目放喺Band A頭3個選擇，但注意唔好花多眼亂，應該「All in」喺自己最想入嘅科；

• 分數中游（五科成績有22至27分）

如果同學嘅分數喺中游位置，修改JUPAS課程選擇對你嚟講就好重要，因為你哋嘅分數係大部分大學課程嘅取錄範圍內，但一啲收生要求較高嘅學科就未必有十足把握。所以同學可以將自己有興趣又有把握考入嘅學科放喺Band A，又或者選擇同心儀學科相似嘅課程或學系；

• 分數屬邊緣（五科成績有17至21分）

而成績唔算考得好好嘅同學，如果一心想讀學士學位，可以選擇一啲收生要求較低嘅大學/科目，咁樣改動可以提高入大學嘅機會。但同學都要注意如果為讀而讀，而入到自己唔感興趣嘅學科可能會弄巧反拙。不過某啲院校對於同學轉換學系方面嘅安排比較彈性，同學亦可以考慮先入讀呢啲學科，然後再申請轉系。

注意事項

• 考生只可新增不多於5項新課程
• 喺分配嘅個人時段內，申請人只可以免費修改課程選擇一次
• 改選前應留意各大院校課程收生要求
• 「大學聯招辦法」網上申請系統每日嘅上午3時至上午6時都會暫停開放以進行系統維護工程

放榜日在即，祝各位同學都報讀到心儀嘅課程，同學有咩問題都可以喺Gööp: 升學講嘅 「你問我答」到隨時發問。即使入唔到心儀大學，條條大路通羅馬都總會有出路嘅！

即刻加入Gööp: 升學講、Gööp: 全中學講：)討論更多有關放榜、升學嘅問題！

— — — — — — — — — — — — — — — — — — — — — — — — — — 
想知道更多大專嘅資訊同加入大專嘅社群就㩒落呢度👉🏻https://goop.ai/