Gööp民調(15)-現階段香港最需要實行咩措施應對「武漢肺炎」?

FB Share

近日武漢不明肺炎病毒來勢洶洶,「武漢肺炎」爆發令唔少香港人聯想到2003年香港沙士呢場嚴重瘟疫,喺03年沙士疫潮中有1755人染病,299人死亡。有最新報告指新病毒與SARS類冠狀病毒有近八成相似,香港人唔多唔少都會擔心「武漢肺炎」喺香港爆發。截至今日,香港已經有累積67宗懷疑「武漢肺炎」嘅個案。喺現階段你又覺得香港最需要實行咩措施應對「武漢肺炎」呢?

樣本資料:

  1. 調查日期:2020年1月6日至 2020年1月13日
  2. 調查方法:經由Gööp網上平台收集意見
  3. 調查對象:香港大專生
  4. 成功收集樣本數目:1430票

民調結果顯示,有接近八成(78%)嘅大專生認為喺現階段香港應該實施出入境管制政策。其他選項分別有注重個人衞生(8%)、其他(5%)、加強清潔公眾地方(3%)、政府派發防護物資(3%),教育市民防疫資訊(3%)。

如果想有效防止疫症爆發,政府同市民都責無旁貸,雙方應該做好分內之事,先可以盡量將「武漢肺炎」喺香港爆發嘅機率降低。首先分析下政府喺現階段點樣對應「武漢肺炎」。

政府

政府對「武漢肺炎」採取嘅預防措施包括:

1.根據CNN報道,香港政府宣佈將會修改法例,把懷疑與武漢不明肺炎疫情有關的個案列為需要呈報,等衛生官員可以強制將懷疑患者隔離。

2. 香港國際機場增設額外的紅外線熱像儀專為由武漢市抵港飛機的旅客作體溫監測。在所有出入境管制站包括高鐵發現有急性呼吸道症狀及發燒旅客。如病發前14天曾於武漢市到訪街市或海鮮市場,就會即時轉介至公立醫院接受隔離治療及跟進。

3. 在政府部門轄下的公共設施加強清潔及保持環境衞生。

除咗以上政府正在實行中嘅政策,Gööper提出政府應該實施出入境管制政策 ,暫時限制曾經喺過去14日去過武漢嘅人進入香港境內。另外,Gööper亦都提議應該將病人獨立隔離,而唔係將所有懷疑染病毒嘅人困埋一齊。除此之外,香港政府可以效仿台灣同澳門嘅做法 — 實行航班檢疫,派出衛生部官員直接到剛從武漢抵達嘅航機上為乘客檢查體溫。

— — — — — — — — — — — — — — — — — — — — —

注意個人衞生

除咗政府部門需要加強戒備,市民都應該做好充分準備。以下有幾項嘅建議提供俾各位Gööper:

1.洗手時應以梘液和清水清潔雙手,搓手最少20秒,用水過清並用抹手紙或乾手機弄乾。除此之外,大家仲可以去買一啲迷利酒精搓手液,可以隨身攜帶咁就可以隨時隨地都用到。

2.出街嘅時候戴住外科口罩,全天候做好自我保護,因為你永遠唔會知你身邊嘅人幾時會打乞嚏同咳。儘量唔好帶黑色棉布口罩,因為黑色棉布口罩只可以隔塵而唔能夠過濾細菌同飛沫。

3.早睡早起。雖然講早睡早起好似好簡單咁,但往往係好多香港人都做唔到嘅一件事,香港人成日都要OT/好多Assessments要交,放假又會一大班人去玩,唔到凌晨都唔散Band。其實早訓可以大大提升免疫力,令身體運作更暢通,有益抗擊感冒等病毒侵入,就算係病都會好得比夜貓快。係朝早起身之後最好入飲返杯溫水,咁就對身體最好啦。

快啲Share呢啲資訊比你關心嘅朋友/家人/愛人啦~提醒佢哋要預防措施啊!

如果你仲想知多啲Gööp嘅討論!歡迎各位同學仔加入對話:http://bit.ly/2tVJ6uY, 了解更多Gööper嘅意見!

— — — — — — — — — — — — — — — — — — — — — — — — — — 
想知道更多大專嘅資訊同加入大專嘅社群就㩒落呢度👉🏻https://goop.ai/

Related articles