上一篇同大家分析咗唔同類型嘅學生有咩要注意，今次就同大家講點樣可以制定一個適合自己嘅DSE study plan。制定一個study plan嘅重要性有兩點：第一要平衡溫書同休息以及各科之間嘅時間；第二確保自己跟到進度，有足夠時間溫書。
制定study plan要注意咩事項?
1.認清自己需要
首先你要知道自己【需要】點樣分配時間。如果你心儀嘅大學學科有某幾科成績嘅基本要求，例如港大Science需要生物科有3或以上，或者新開嘅文理學士需要英文有5。你就需要投放更多時間喺呢啲有特別要求嘅科目到。
另外會唔會有一科成績特別好，想特別谷到5**？有一科成績麻麻，想用更多時間去拉翻上平均水平？(touchwood)有幾科都below average，保住全部合格之後再逼翻個5**比其中一科？
以上幾點都係set study plan之前要諗清楚嘅因素，可以參考以往校內考試成績，自己過往溫書時候溫每科時間比重，有無邊科到目前為止都比較唔明或者生疏等等，去衡量自己嘅情況同埋需要。
分析完之後，你可能選擇平均分配時間比每一科，或者將時間側重於部分科目。最重要記住嘅係，無論點都好，唔好放棄完全唔掂任何一科，始終到最後可能出嘅題目都係你有把握嘅題目最後成績唔錯，點都好過你大部分科目成績OK但係成績單上面出現個「1」或者「ABS」。
2.整理課程大綱
分配好每科時間之後，就到下一步去整理課程內容。你或者會問「大佬，中六啦，過去四年讀咗咩我會唔知？」冇錯，真係會唔記得，尤其係中三學嘅嘢，因為未開始高中學制，DSE壓力未到，所以好容易唔記得中三學過咩。課程內容係講緊究竟每一個科有啲咩topics（不適用於中英文）。
考評局其實每一科都有出一份curriculum and assessment guide (C&A guide)，裏面列舉曬所有果科嘅topic出黎，我哋要做嘅就係將呢啲topics再整合出黎做一個簡單嘅列表。
用Biology做例子，首先第一步就係去搵份C&A guide：https://334.edb.hkedcity.net/new/en/curriculum.php
第二步就係要搵個list出黎，要知詳細每個topic嘅內容可以睇第19頁打後，我地依家要做嘅淨係第14–15頁嘅list（節錄）：
I. Cells and Molecules of Life
a. Molecules of life
b. Cellular organisation
c. Movement of substances across membrane
d. Cell cycle and division
e. Cellular energetics
當中已經有幾個topic係中三內容，記得要將用時間去溫翻！除中英文之外，其他科都建議用以上嘅步驟溫習。
3.詳細計劃
知道時間分配同埋課程大綱之後，就可以開始落手分配時間。Excel或者Mac機嘅Numbers都係可以用黎set schedule嘅software。
首先寫好考試期間嘅時間，喺每個筆試之間嘅日子都用嚟溫下一科要考嘅科目。例如如果我選修係物理、生物同經濟。咁考完物理到考生物之間幾日我就會嚟溫生物。將上面搵翻嚟嘅topic分3組，分別係16–18號每日溫一組加做paper，然後19號就做一整份嘅pastpaper or mockpaper等等。另外考第一科筆試之前預留翻2–3日做最後嘅衝刺。
至於由今日開始嘅4個禮拜時間，按照翻你第一part分配比每科嘅時間，將第二part嘅topics填入個schedule裏面；例如3月8號我要溫完Biology嘅 “Cells and Molecules of Life”同 “Genetics and Evolution”，3月9就係 “Organisms and Environment”。詳細寫你點樣將唔同課題分組。建議大家按照筆試嘅先後嚟訂，先考先溫，而每一日溫嘅topics都係同一科嘅topics。
4.放假
雖然DSE時間緊迫，正如做gym都有rest day，你嘅schedule都要記得預留時間做rest day。喺呢個rest day你唔好安排任何溫習目標，大概一星期一次。呢個rest day嘅最主要目標係比自己放個假，緩解下自己嘅壓力，建議大家留係屋企煲劇打機就好啦，病毒危機未解除，盡量就唔好走圍去啦。
最唔理想嘅情況之下，你跟唔切plan咗嘅進度，都係要靠rest days黎追趕進度。當然咁樣係唔理想，所以大家更加要盡力跟到本身嘅溫習時間表，令自己有真正嘅休息日！
上一個好嘅study schedule除左可以幫你分配好時間之外，亦可以成為你嘅推動力，快啲plan一個study schedule，儘早開始DSE嘅倒數生涯！
相關文章：
1.HKDSE Tips Youtube Video 懶人包
By Gööp 升學攻略大使：Coeus Lee
工商管理學學士(法學)及法學士二年級 香港大學
— — — — — — — — — — — — — — — — — — — — — — — — — —
想知道更多有關中學嘅資訊同加入全港中學生嘅社群就㩒落呢度👉🏻https://goop.ai/
