2020DSE 衝刺攻略(4) — 溫書注意事項

FB Share

2020DSE 衝刺攻略(4) : 溫書注意事項

之前講咗好多關於DSE倒數階段嘅時間同心態嘅準備,今次就講關於溫書嘅時候有咩要注意。一般溫書步驟,不外乎背書、睇notes、操paper等等。同樣嘅內容,點解有人一日可以操四份以上paper,而有人一日淨係睇書都睇唔切呢?以下就講幾點關於溫書/操卷嘅時候可以令自己提高效率嘅注意事項:

(一)幾時「溫書」幾時「操卷」?

好多人溫書嘅時候都會遇到一個問題 — — 我幾時先算係背夠數睇夠notes,可以開始落手操卷呢?係香港嘅考試制度之下,其實肯操卷嘅學生係有絕對嘅優勢。但正如第一篇倒數時刻所講,每一個學生都有最適合自己嘅一個溫書模式,所以呢度將會講嘅,只係一個大概框架。

如果你喺呢個study period係第一次掂呢個topic的話,我會建議你用更多時間睇睇書,先操paper,大約比例係6(溫書):4(paper)。當然,如果你睇書嘅時候好快就喚醒到過去四年嘅記憶,你有信心自己已經足夠熟悉課程內容嘅話,當然可以提早開波操paper。

喺study period後期,睇書嘅時間相對就會少啲。去到呢一刻,睇書最主要都係喚醒返啲記憶同埋再努力溫返之前五首做paper覺得吃力同唔識嘅部分,所以比例會變成2(溫書):8(paper)

(二)溫書有最佳時間?

假設一日瞓八個鐘,係咪代表淨低十六個鐘都要溫書?答案好明顯就唔係啦,上一篇都有講到生活習慣、食飯等等都盡可能如常進行,咁究竟有無咩鐘數溫書會有著數?

其實正常人起身之後都需要少少時間令自己身體都「wake up」,而「飽暖思床褥」更加唔使講,食完飯真係會眼瞓。所以,當你有一個常規嘅作息同飲食時間,係起身之後同飯後都預留半個鐘至一個鐘做少少exercise warm up同wake up自己,會令成個溫習過程比較順利。

同時,因為身體去到夜晚,食完晚餐後會開始進入休息狀態,所以唔建議係夜晚溫書,最多食完dinner可能溫多一個鐘書就要準備瞓覺。臨瞓前三十分鐘千祈唔好繼續溫書,可以上YouTube或者其他聽歌嘅Apps搵令人relax嘅playlist,用音樂放鬆心情。

(三)邊度溫書好?

自修室以前可能係一個好嘅選擇,但依家肺炎肆虐,加上年年都有新聞話自修室空氣唔夠流通,為咗健康起見,都係盡量唔好落街,留係屋企溫書好啦。

我曾經睇過一本小說,有一句經典語錄大概係「方圓200米有張床,除左訓覺你咩都做唔到。」當然呢句講得比較誇張,但的確溫書嘅最大敵人就係瞓覺,而如果有張床係你視線範圍之內將會係你精神力嘅一大挑戰。因此,我建議大家溫書嘅時候盡量唔好留係睡房裏面。當然,如果你係一個好容易被滋擾嘅人,你或者會揀呢個無人出出入入嘅睡房溫書,如果唔係,其實飯廳或者書房都會係更合適嘅溫書地點。

(四)點樣保持清醒?

首先最簡單直接嘅方法,就係確保自己睡眠足夠。當你每晚都瞓夠七至八個鐘嘅話,你可以確保自己嘅「攰」係黎自「悶」而唔係「眼瞓」。另外要注意溫書地方光線要足夠,人係比較昏暗嘅環境下,係比較容易眼瞓嘅。

如果溫溫下書覺得好攰,你可以選擇攞凍水洗面,或者做少少體操動作,拉拉筋,聽下搖滾、HipHop、爵士音樂等等,比自己嘅感官小量刺激,可以令自己恢復清醒。

隨身準備一樽水、幾粒糖同朱古力,係好攰嘅時候攞出黎飲食都有即時提神嘅效果。當然,如果真係頂唔住嘅話,瞓個晏覺都不妨係一個好選擇。

(五)邊溫書,邊____?

唔少人都有習慣一邊溫書,一邊聽歌或者食零食。溫書過程沉悶,搵少少樂趣無可厚非,但可能timing要揀得好啲。

今次係有真.科學研究,指出如果溫書或操paper期間聽歌,會令到學生分心,效率比唔聽歌嘅學生低。但係呢兩類學生都輸咗比喺溫書「之前」聽歌嘅學生。所謂「音樂有助人嘅記憶力」,根據呢個實驗結果顯示,如果學生係溫書之前10–15分鐘聽吓音樂,會有助溫書嘅時候更加容易記入腦。同樣地,食零食可以為身體補充能量,但同時都令自己分心。所以如非必要,將零食收起,同自己講溫完呢科就可以食,相反會係一個動力令自己溫書溫得更快!

(六)記憶法

最後想分享幾個記書嘅方法。有時候死記硬背真係唔適合香港嘅考試制度同學生,所以以下係兩個我自己考DSE嘅時候幫自己記低重點嘅方法:

  1. 圖像記憶法

一個好有用嘅方法,就係首先將個topic嘅內容畫成一個mindmap。其實好多textbook本身都有個mindmap或圖表係放喺每一課之後。圖像記憶法就係記得成個圖嘅layout,同埋大概嘅文字,從而記住呢一課嘅重點。由於圖像記憶用嘅係右腦,所以可以令大家係一般左腦嘅記憶之上,多一層記憶,令自己更熟呢一課。

  1. 字母記憶法

正如大家會記得六何法「5W1H」或者環保「4R」,如果我地將溫嘅內容轉化成字母會更容易入腦,簡單嘅例子就係BAFS Management嘅planning嘅「SMART」goals (Specific 準確, Measurable 可量度, Achievable 可達成, Relevant 相關, Time 時間),或者Biology嘅生物7特徵「MRSGREN」(Movement 活動, Respiration 呼吸, Sensitivity 感知, Growth 生長, Reproduction 繁殖, Excretion 排泄, Nutrition 營養)等,大家可以自己探索探索。

希望以上六點可以幫到大家達致一個高效率嘅自修時間,將最後呢一個月嘅拼搏時期好好運用,令自己考試嘅時候都考得輕鬆自信啲!

By Gööp 升學攻略大使:Coeus Lee

工商管理學學士(法學)及法學士二年級 香港大學

相關文章:

1.HKDSE Tips Youtube Video 懶人包

2.2020DSE衝刺攻略:認識自己

3.2020DSE 衝刺攻略(2): 制定計畫

4.2020DSE 衝刺攻略(3): 保持心態

— — — — — — — — — — — — — — — — — — — — — — — — — — 
想知道更多有關中學嘅資訊同加入全港中學生嘅社群就㩒落呢度👉🏻https://goop.ai/

Related articles