呢排相信大家無論fresh grad或者啱啱畢業都忙住搵工，而今個星期Shall We Talk就同大家傾完搵工有咩煩惱啦。而跟據小編嘅非正式研究就幫大家整合咗幾個大學生最常見嘅part-time，比大家搵工都有個方向！
1. Sales
通常最受學生歡迎嘅part-time就係sales啦，因為做sales唔需要太多經驗，而且呢類屬多勞多得嘅工，返得多shift就有多啲錢。對於時間鬆動嘅大學生嚟講就啱哂啦，買嘢仲有折添！而通常最常見嘅選擇都係American Eagle、Hollister、Uniqlo等，不過疫情底下嘅零售業就未必會請好多人啦。
2. 私補
而家啲小朋友細細個開始就要補習，而大學生就正正可以食正呢行飯啦。好多家長或者補習中介都會搵大學生幫中小學生補習，咁辛苦讀到上大學咁多年嚟學習嘅知識終於大派用場啦。而家大學生私補通常差唔多$150-$200一個鐘，而幫人補習一星期就只係花幾個鐘，所以好多大學生都會幫人私補賺零用錢。
3. 炒散
所謂炒散其實分好多種，普遍返一兩次即時或者即pay嘅工例如係餐廳waiter或者promoter都可以稱為炒散。而最common嘅炒散工就係酒店宴會啦，通常都係去宴會幫手斟茶遞水傳菜等。呢類嘅工就啱哂啲唔想返長part-time綁手綁腳嘅同學仔，不過疫情底下所冇event活動都相對少，炒散嘅機會都少咗好多啦。
4. 技能相關工作
仲有一類工係大學生必做嘅工作，就係一啲需要相關技能嘅工啦。好似講到好虛咁，其實即係好似救生員咁，好多大學生都會選擇去一啲私人會所做救生員，因為時薪夠過又夠hea…不過就要有考牌先可以做。另外都有好多同學會私人上門教鋼琴，都係一啲需要某項技能而且時薪較多嘅工。
5. 另類工種
咩係另類工種，就例如係神秘顧客等等小編就聽過有朋友分享，試過去做某啲餐廳/美容院做嘅神秘顧客，為公司嘅服務嘅服務評分，既可以享用佢嘅服務，而車馬費通常都唔少㗎。不過小編自己就未試過啦，唔知係咪要識人先可以返到呢啲筍工㗎呢。
相關話題：
唔知咁多位Gööper有冇返過以上嘅工呢，有嘅不妨試Gööp同大家分享吓啦！
如果你仲想知多啲Gööp嘅討論！歡迎各位同學仔加入對話，了解更多Gööper嘅意見！
— — — — — — — — — — — — — — — — — — — — — — — — — —
想知道更多香港學生嘅社群就㩒落呢度👉🏻https://goop.ai/
