2020大學攻略-CU中大生存手冊

FB Share

和聲!!和聲!!講起中大除咗dem beat仲諗起啲咩?新學年即將入讀中大嘅同學仔仲有大把嘢你要知呀,快啲睇哂以下嘅中大生存手冊保命啦!

一、簡介

香港中文大學,又名中大/暴大/ CU / ChinU,位於新界沙田馬料水,東鐵「大學站」就係啦。中大校園依山而建,佔地仲大過梵蒂岡,周圍又係花草樹木,所以有「山城」之稱。

書院制

講起中大特色,一定非「書院制」莫屬。中大有九間書院,分「四舊」同「五新」。而唔同書院有唔同宿舍、活動、獎學金,但同你嘅學科係冇關係嘅。簡單啲講書院可以類比為哈利波特入面嘅葛萊分多同史萊哲林,或者中學嘅社,當然規模同影響嘅層面更加大啦。書院絕對會影響你部份嘅大學生活,不論圈子定生活模式,所以入中大想要咩生活都豐儉由人㗎!以下會介紹唔同嘅書院啦!

崇基學院(Chung Chi College)

  • 崇基學院,大家都叫CC
  • 有基督教背景
  • 資源最多嘅書院之一,出名多錢多船
  • 覆蓋範圍幾乎係中大整個山腳位置
  • 十間宿舍同一個走讀生舍堂,宿舍文化係中大最強嘅,有唔少宿舍之間嘅活動
  • 都要出席較多週會,要做FYP(Final Year Project)

新亞書院(New Asia College)

  • 人人都叫NA
  • 中大歷史最悠久嘅書院
  • 位於山頂嘅NA有四間宿舍,景色一流-
  • 由一班反共學者創立,強調儒家等人文精神
  • 每年一樣有幾個大活動畀NA人盡情玩,唔洗做FYP
  • 比起其他書院資源較少,對錢同船唔好抱太大期望

聯合書院(United College)

  • 簡稱UC
  • 位於山頂,有四個宿舍,環境都算唔錯
  • 每年都有幾個大活動畀同學參與
  • 除咗要做FYP之外,每樣嘢喺四舊書院嚟講算不過不失。

逸夫書院(Shaw College)

  • 通常會直接叫佢Shaw
  • 位於中大後山最入位置
  • Shaw人出哂名玩得Yo得,亦都有唔少大規模書院活動
  • 住得 Shaw就預咗「Don’t have Hall 」喇,事關佢得兩棟宿舍,而且住宿率都較低

和聲書院(Lee Woo Sing College)

  • 有廣為人知嘅「和盡天地風雲之聲」Beat詞
  • 位於後山位置
  • 五新書院嚟講算係多嘢玩
  • 宿舍設備齊全,每間房都有雪櫃
  • 適合想玩又唔想住四舊嘅人

伍宜孫書院(Wu Yee Sun College)

  • 又名523/數字書院
  • 人唔多,活動都搞得唔大規模
  • 位置又處於後山,因此成日俾人笑老人院/摺
  • 院方好支持學生實踐環保同創新嘅理念,除咗好多交流機會,書院入面仲有個創意實驗室

善衡書院(S.H. Ho College)

  • 位於山腳位置,四通八達,
  • 四年必宿,規定學生一定要住宿舍,宿舍環境良好,設備齊全
  • 有「共膳」,規定某啲時間全書院嘅人一齊喺飯堂食飯
  • 人數只有600人,全部人又一齊住喺兩棟宿舍,畀人一種家嘅感覺

晨興書院(Morningside College)

  • 位於山腳位置
  • 四年必宿
  • 有過半嘅學生都係國際生,書院人數只有300
  • 亦有「共膳」聚埋大家一齊食飯
  • 生活得耐會識到好多外國人,講得一口流利英文

敬文書院(CW Chu College)

  • 位於中大後山較偏僻嘅地方,一個世外桃園
  • 基於外觀,加上都係四年必宿,亦有「共膳」,經常被稱「敬文酒店」
  • 有學生亦會選擇踩單車去上堂
  • 適合想住宿,又想遠離煩囂嘅人

二、地標/設施

中大大致上可以按地理位置分為四個部份:

  • 山腳:中大山腳一帶,近大學站,覆蓋崇基、善衡、晨興三間書院
  • 本部:中大山腰,唔屬於住何書院嘅地方,大學圖書館、科學館、百萬大道都喺嗰度
  • 山頂:中大之巔,海拔最高嘅地方,覆蓋新亞同聯合書院
  • 後山:山頂後嘅地方,中大嘅後花園,位置較偏僻,範圍亦好大,覆蓋逸夫、和聲、伍宜孫、敬文四間書院

景點/特別地方

中大咁大,有啲地標你係一定要知嘅:

  1. **民主女神像:**簡稱「民女」,係喺大學火車站A出口一個有象徵意義嘅一個雕塑。「民女」亦可解作大學站A出口對出空地,約人搭地鐵走可以約「民女」等
  2. **未圓湖:**崇基嘅一個湖,假日會吸引唔少情侶同家庭喺旁邊野餐
  3. **煲底:**位於本部嘅科學館對出空地,由於科學館其中一部份外型太似一個煲,所以空地位置就叫煲底
  4. **百萬大道:**原名林蔭大道,係喺中大本部一個好大嘅廣場,連接「煲底」同大學圖書館。相傳百萬大道用咗一百萬蚊整,又有人話百萬大道用咗一百萬塊磚砌成,點解叫百萬大道嘅真正原因到宜家都冇答案
  5. **烽火台:**大學圖書館對出嘅一個地台,地台上有「仲門」
  6. **仲門:**係一個好似門嘅嘅藝術品,傳聞穿過仲門中間會畢唔到業
  7. **文化廣場:**本部於范克廉對出嘅小型廣場,由學生會管理
  8. **天人合一:**合一亭,位於新亞書院,由於嗰度影相太靚,係遊客嘅打卡勝地。呢個地方經常引嚟過多街外人入侵中大,對中大人生活造成困擾
  9. **七小龍:**YIA大樓有七條扶手電梯,一次過搭到哂7條嘅機會低過中六合彩,因為總有一條係壞緊嘅
  10. **小橋流水:**一條由崇基教堂通往本部嘅長樓梯

教學大樓

由於真係太多大樓喇,呢度只介紹啲一定要識嘅地方先。

  • CYT鄭裕彤樓:地位於鐵站B出口巴士總站外,係商學院嘅基地
  • YIA康本國際學術園:山腳一棟幾大嘅大樓,同WMY相連重,上必修科目好大機會喺度上
  • WMY伍何曼原樓(五條鰻魚):山腳一棟幾大嘅大樓,同YIA相連,上必修科目好大機會喺度上
  • AIT綜合教學大樓:話就話綜合,但其實係建築系嘅地頭
  • ELB利黃瑤壁樓:山腳嘅教學大樓
  • 三兄弟:信和樓、陳國本樓、王福元樓,由於三棟大樓連住,人 人都叫佢三兄弟
  • LSB邵逸夫夫人樓(Lady Shaw):本部教學大樓之一,有個好大嘅天台花園
  • LSK李兆基樓:本部教學大樓之一,法律系地頭,有一部連接山頂同本部嘅電梯
  • MMW蒙民偉樓:本部教學大樓之一,有一部連接山頂(新亞)同本部嘅電梯
  • U Lib 大學圖書館:位於本部,全中大最大嘅藏書閣
  • Engineering Building工程學大樓(展標):工程仔嘅地頭,部份地方會收唔到訊號,有部連接山腳同本部嘅電梯

中大地圖:

三、Canteen

由於中大實在太大啦,唔同書院都有好幾個餐廳,所以以下就介紹吓主要嘅幾個食堂,不能盡錄敬請原諒!

山下

  • 崇基學院學生膳堂(眾志堂)

地點:未圓湖旁、眾志堂

  • 李慧珍樓咖啡室

地點:李慧珍樓G/F

  • 蘭苑

地點:何添樓側

  • 清真快餐店

地點:李慧珍樓G05

  • 晨興書院Canteen

地點:格林伯格樓LG/F

  • 晨興書院咖啡閣

地點:晨興書院高座地下

  • 善衡書院餐廳

地點:陳震夏館一樓

  • 善衡書院教職員會所「雅薈」

地點:陳震夏館一樓

  • The Stage

地點:鄭裕彤樓3/F

  • Cafe 330

地點:康本國際學術園

本部

  • 李卓敏醫學大樓小食店(Med Can)

地點:李卓敏基本醫學大樓G/F

  • 范克廉樓咖啡閣(Coffee Corner)

地點:范克廉樓G/F

  • 范克廉樓學生膳堂(大膳堂)

地點:范克廉樓G/F

  • 范克廉樓教職員餐廳

地點:范克廉樓G/F

  • 李兆基樓咖啡室

地點:李兆基樓LG/F

  • 女工合作社(女工)

地點:范克廉樓LG/F

山上

  • 新亞書院學生餐廳

地點:樂群館梁雄姬樓LG/F

  • 新亞書院雲起軒

地點:樂群館梁雄姬樓G/F

  • 新亞書院教職員餐廳

地點:樂群館梁雄姬樓LG/F

  • 聯合書院教職員餐廳聚賢軒

地點:張祝珊師生康樂大樓G/F

  • 聯合書院教職員會所文怡閣

地點:張祝珊師生康樂大樓三樓

  • 聯合書院學生膳堂

地點:張祝珊師生康樂大樓G/F

  • 聯合書院思源館

地點:鄭棟材樓地下室

後山

  • 敬文書院餐廳

地點:敬文書院G/F

  • 敬文書院咖啡館

地點:敬文書院1/F

  • 伍宜孫書院學生飯堂

地點:伍宜孫書院西座LG/F

  • 伍宜孫書院咖啡閣

地點:伍宜孫書院西座LG/F

  • 伍宜孫書院教職員餐廳

地點:伍宜孫書院西座G06

  • WS Pavilion

地點:和聲書院LG2

  • 和聲滬軒

地點:和聲書院LG2

  • Cafe Tolo

地點:和聲書院G/F

  • The Green

地點:和聲書院LG2

四、特色文化

1. 藝墟每年開學頭,中大唔少學會都會喺百萬大道擺Booth招生,向新生介紹自己。當中有表演,有嘢食,有嘢玩,好似一個嘉年華咁,氣氛幾開心㗎!

2. Dem Beat

提起中大,好多人第一時間都會諗起Dem Beat。中大絕大部份學會、學系、活動宣傳定Ocamp都會Dem Beat,Beat詞同動作各有特色。雖然好多人都覺得Dem Beat 好難頂,但亦有唔少人覺得係中大特色,冇Dem過Beat唔好話自己讀中大。唔知大家又點睇呢?

3. 四七「四七」顧名思義就係四句七個字,Total廿八個字嘅一段字。通常「四七」會作嚟片人,或者用嚟讚自己。好嘅四七聽落簡單直接,有創意,同時保留到每句最後一隻字係押韻。大家喺Ocamp、上莊、定其他活動都會搵到「四七」嘅蹤影。

4. 食宵

唔理係去火炭食、去大圍食,定去大埔墟食,總之讀得中大食宵夜嘅頻率會大大增加。Ocamp又食、組聚又食、傾莊又食、完咗活動都會食!

5. 會師

每年中大嘅大O(書院Ocamp) 都有一個環節叫「會師」又名「互片」,喺百萬大道舉行。「四舊」同「五新」書院會分開進行,內容大致就係輪流向其他書院Dem Beat/片四七,踩其他人讚自己。成個百萬大道咁多人喺度嗌,場面幾咁墟冚!當然大家都明係玩下,冇惡意嘅。

6. 校巴

成間中大咁大,冇校巴基本上係生存唔到嘅。唔好睇啲校巴路線咁複雜,搭下搭下就慣㗎喇。中大人搭校巴仲有自己嘅禮儀,例如落車時會同司機叔叔講「唔該司機」。

7. 頹?山區兒童?村姑?

中大宿舍全部都喺校園內,變相令唔少人會「落街上堂」,經常會見到中大人著「頹tee」、短褲、「踢拖」,冇乜打扮。其實換個角度,大家都當中大係屋企,咪用自然啲嘅一面生活,打扮樸素啲囉,都係中大嘅特色嚟!

五、新學年安排

  • 課堂轉以網上形式進行,直至疫情穩定為止
  • 所有學生迎新活動以網止形式舉行
  • 本地學生宿舍將暫時停止接受申請,直至另行通知
  • 建議身處香港地區以外學生目前不要返回校園

同學有咩關於中大嘅問題都可以入Gööp中大講瘋狂討論或者留意中大學生會 CUSU嘅最新消息啦!

— — — — — — — — — — — — — — — — — — — — — — — — — —
想知道更多大專嘅資訊同加入大專嘅社群就㩒落呢度👉🏻https://goop.ai/

Related articles

Get Gööp app to engage with your community now!

Google Play LinkApp Store Link