讀中學嘅時候，你身邊又有冇遇過呢5種人?

所謂學校就係社會嘅縮影，相信喺中學時期嘅你哋，都已經會見到唔同類別同特質嘅人，如果你想喺中學生涯裏面，認識更加多唔同嘅人就要睇下呢篇中學時期經常遇到的五種人嘅分析啦 ！

(一.) 學霸型

簡單嚟講學霸即係一啲讀書叻嘅人。 呢一種人好鍾意坐頭兩行，每次上堂你都會見到佢有滿滿嘅筆記同驚人嘅集中力，而佢哋嘅自尊心亦都好強每一次嘅測驗同考試就係佢哋Show off嘅機會，小編曾經有見過一個學霸，因為英文考試寫多咗個s扣咗0.5分，佢當場灑淚！身邊嘅同學亦都o曬嘴，但同佢哋做朋友有一個好處，佢哋會好肯教你做功課成為你嘅小老師，當然，朝早你冇做功課你都可以拎佢啲功課… 參考參考~你明㗎啦 ! 唯一唔好嘅係佢哋會有少少神經質,小心唔好觸碰佢哋嘅地雷。

（二.) 運動型

呢種類型嘅同學無論係男定女都非常受同輩歡迎，因為佢哋有某方面嘅才能， 例如某某排球校隊又或者係籃球校隊 ， 呢啲都比較容易成為學校嘅風頭躉〜

中學時期運動型嘅男生呢係比較容易談戀愛嘅，因為佢哋有好多唔同選擇。不過運動型嘅男生有一樣嘢唔係太好，就係可能唔係太著重學術成績，因為小息又打波Lunchtime又打波，放左學都係打波，邊會畀心機讀書㗎〜仲要每逢返到課室都要搞到課室嘅空氣瀰漫著一陣臭汗味 喺極臭…。但同呢種類型嘅人做朋友都好嘅，起碼佢哋會帶埋你一齊去做運動 ，尤其係依家呢啲時勢，心肺功能的確好重要〜

（三.) 娘娘型

所謂靚女呢就真係有著數啲嘅， 無論你係邊一級都好，只要你係身材外型比同級嘅人突出，你都會吸引好多師弟師兄嘅眼球，從而進貢唔同嘅零食同飲品俾你嘅〜 小編以前間中學入面，一級都好多呢類型嘅人。

小息從來唔使自己行落去買小食，落堂鐘聲一響呢 就會有啲人自動入課室畀嘢你食，零用錢都慳番！假如同娘娘做到朋友 ，你有運啦 ，你可以幫娘娘分擔零食同嘢飲〜

當然，你都要習慣一啲嘅閑言閑語，例如話你係跟班呀收兵呀之類啦，但我自己就覺得呢一啲嘅體驗唔係每個人都有嘅，偶然試下都無妨嘅〜

(四.) 透明人

返學嘅時候，我哋總有遇過一的頭dupdup，講嘢又慢，又存在感低嘅透明人。

呢種類型嘅朋友唔知點解都好中意去圖書館做管理員，可能佢哋想遠離人群，又唔想主動去同人溝通，所以班會活動都唔會有佢哋嘅存在。因為佢哋淨係活喺自己嘅世界。其實咁樣做只會令到透明人嘅存在價值越來越低，最後可能畢業嘅時候令佢哋個名都會唔知道，但如果你哋幫佢哋建立返自信心，多啲同佢哋傾計關心佢哋,或者你會令到佢嘅校園生涯，添上一點色彩!

（五.) 缺一不可嘅肥仔

每一級都會存在著一個好好笑嘅肥仔，佢總係全班嘅開心果 ；氹老師開心嘅學生，大家嘅好朋友。每當有班際比賽或者運動會嘅時候 ，呢個肥仔都仲係會第一時間幫人哋打氣同嗌口號，肉緊嘅表情總會令到佢身邊嘅人覺得自己感到重視 。同佢哋做朋友 ，可能佢哋未必會願意分享佢嘅食物畀你哋 ，但佢好樂意引你笑令到你開心 ，唔好睇少肥仔呢種潛力股啊，可能十年之後見番佢，可能變咗彭于晏咁靚仔㗎〜 姜濤咪就係一個例子囉！

啲人成日講要帶眼識人唔好誤交損友 ，但喺中學時期其實冇所謂嘅損友，可能有啲同學係貪玩啲啫！所以無論你而家喺中學嘅時候遇到咩人都好，放膽去認識啦！

如果你仲想知多啲Gööp嘅討論！歡迎各位同學仔加入對話，了解更多Gööper嘅意見！

— — — — — — — — — — — — — — — — — — — — — — — — — —

想知道更多有關中學嘅資訊同加入全港中學生嘅社群就㩒落呢度👉🏻https://goop.ai/