ASSO/HD/大學生去exchange/海外升學必睇IELTS入門攻略

FB Share

簡介(點解要考/幾錢)

IELTS,全名為國際英語測試系統(International English Language Testing System),係著名的國際性英語標準化水平測試之一,部分學校會將IELTS成績列入收生要求。如果去歐美國家exchange嘅,有唔少學校更加要求IELTS要有一定嘅分數。各分卷同overall都會好似DSE咁有一個分,1係最低,9係最高。

喺香港,同學可以透過英國文化協會(British Council)同IDP兩間機構報考。兩間價錢都係$2,090,成績有效期兩年。

考邊一種IELTS?

Academic(學術組別),內容較深入所以認受性較高,在本地或海外升讀大學(包括non-Jupas) 都適用,日後就業時僱主亦較著重。

1.時間/考場

一般會喺星期六日考,朝早考reading,listening同writing,計埋派卷同收卷大概要考三個半鐘,仲要早半個鐘報到,中間唔會有任何休息時間。下晝就考speaking,每個考生嘅考試時間唔同,喺考之前一個禮拜佢就會send email通知確實嘅時間。

筆試通常嘅考場係酒店嘅hall/英國文化協會,而口試通常會喺附近另一間酒店嘅客房應考。當日嘅時間會比較緊迫,所以大家最好早幾日搵定考場喺邊,確保萬無一失。

2.分卷

Listening:總共有四 part,MC同短題目為主,間中會有啲特別嘅題型好似地圖題,比起DSE listening嘅part A簡單,個人覺得係咁多分卷之中最客易拎高分。依個分卷無咩特別嘅skills,只要做得多聽得多就會有唔錯嘅成續。

Reading: 時限係60分鐘,有三篇文章,由淺入深,無長題目,最普遍嘅題型係問每段嘅大意同true false not given。我建議嘅做法係先用好短嘅時間睇一次有咩題型,然後睇完每一段就即刻去做相關嘅題目,咁可以避免浪費時間去翻睇篇文。時間分配應該係15mins,20mins,25mins。

Writing: 時限係60分鐘,有兩個task。Task 1主要係describe題目比你嘅野,最常見嘅係唔同嘅圖表(eg:bar chart,line chart),間中都會有好似地圖、說明書等等嘅題型,依part係考你點樣可以用精簡嘅文字清晰咁表達個圖表,唔太需要自己嘅推論,亦唔駛寫好長,大概200–250就得,最好用20–25分鐘寫完佢。

Task 2佢通常會比一段statement你,要你講正反立場嘅論點,再決定你支持邊一面,依part全部都係要自己諗論點同做推論,最好要預返35–40分鐘寫完佢。IELTS比較注重grammar、句式同vocab,比起寫好多字去擴充內容;用唔同嘅句式、vocab同準確嘅grammar更加重要。

Speaking:總共有3個part。Part 1主要係問關於你自己嘅野,啲問題唔會好複雜,每題大概答30秒至一分鐘。Part 2佢會比一條題目你,題型比較似DSE嘅speaking,你會有一分鐘嘅準備時間,之後再講二分鐘。Part 3佢會喺一兩個theme入面問你幾條問題,依part嘅問題會比較長同難,需要你答嘅野都比較多,每題大概要用一分鐘作答,唔會有任何嘅時間比你準備。

Speaking嘅四個marking criteria係fluency&cohesion、vocabulary、grammar同prounciation,對content嘅要求唔高,所以唔駛迫自己要用啲好獨特嘅point,普普通通嘅就可以。相反你講嘅每一句野都要準確同清晰,最好用到唔同嘅句式同grammar,最緊要自然,當個考官係同你傾計就得。

總括而言,IELTS嘅難道同DSE唔係差好遠,但係形式同評分標準有較大嘅分別,只要做好準備就可以考到滿意嘅分數!

Related articles